قصه ما خابرش ما اعرفش

 ما خبراش ما عرفاش.

فى قرية من القرى بنت بسيطة راحت لابونا قالتله انا عايز اخدم..

قالها انت اسمك ايه قالتله"جميلة"

فقالها انتى بتعرفى تفكى الخط ؟! قالتله لا

قالها طب حافظة الحان ولا ترانيم؟ قالتله لا

قعد يسالها شوية اسئلة دينية كل ما يسالها سؤال

تقوله ما خبراش ما عرفاش..

ابونا قالها طب يا بنتى انتى ممكن تيجى تصلى عادى 

مش لازم تخدمى الخدمة ليها مواصفات معينة..

قالتله طب انا اما اعرف اخيط حلو قوى ..

قالها خلاص اى حاجة محتاجة خياطة فى الكنيسة هندهالك تخيطيها..

كانت جميلة كل مرة تاخد حاجة تخيطها تقعد فيها ساعات طويلة بالرغم من انها كانت ممكن تاخد دقايق علشان تتقنها وتطلع باحلى شكل وطول ما هى بتخيط تصلى وتقول يارب اللى ياخدها تعجبه ويتبسط بيها يارب ساعدنى تطلع حلوة..

وتمر الايام وفى يوم من الايام والناس خارجين من الكنيسة لقيوا رجل لابس لبس مقطع ومطلبش من حد خدمة كل الناس مشيوا بما فيهم الخدام..

لكن جميلة اول ما طلعت من باب الكنيسة وشافته جريت عليه..

وقالتله ايه اللى مقعدك هنا فى البرد دا تعالى معايا البيت..

وطول السكة تقوله انت اسمك عمى مين؟! ميردش

تقوله انت منين ؟! ميردش..

طب عيالك فين ؟! ميردش

يبصلها ويضحك ..

وهى تضحك وتقوله خبريه مالك..

وصلوا البيت وخدته فطرته وعملتله شاى..

وقالتله هات الجلابية دا اخيطهالك ..

خدت الجلابية وخيطتها ..

وبعد ما ادتهاله ...قاله تعرفى انا مين يا جميلة ؟!

قالتله يعنى طلعت اما تتكلم لا ما خبراش انت مين..

قالها انا المسيح اللى بتخدميه وبتخيطى الحاجات المقطعة فى كنيسته كل مرة بتخيطى لبس وحد بيلبسه من اخوة الرب كأنى انا اللى لبسته ..

انتى خدمتك جبارة اتفوقتى على كل الخدام بما فيهم ابونا .. وليكى فى السماء اكليل كبير ..

وفى الحال الاوضة اتملت نور وبخور واختفى المسيح..

وبعدها قررت جميلة تكرس نفسها للخدمة دى وتخيط اى حاجة فى كنيستها وكل الكنايس اللى فى القرى المجاورة.. 

انا عايز اقول مفيش حاجة اسمها مواصفات للخدمة 

اى حد يقدر يخدم المسيح سواء متعلم او جاهل ..غنى او فقير.. جميل او لا..

الخدمة محتاجة الكل والكل ينفع يخدم باللى يعرف يقدمه .. والمسيح عنده اللى بيمسح كنب كنيسة صغيرة كام متر فى قرية بعيدة محدش يسمع عنها وهو مبسوط وفرحان بخدمته اعظم من اللى بيوعظ فى اكبر كنيسة وعلى اعلى منبر وهو كل همه ياخد اللقطة..

[اخدموا كما ينبغى]