تأمل فى أية يبتهج بك ترنما

فضلت كتير مش فاهمة الآية دي :

" يبتهج بك بترنم " ( صف 3) وفاكرة اني وقفت عندها كتير جدا وانا بحضر سفر صفنيا من سنتين .. لغاية ما روحت اشتري عصفور كناري .. وانا عند الراجل بتاع العصافير سمعت صوت عصفور بيعمل نغمات جميلة جدا بصوته .. انا مكنتش اعرف وقتها صوت لكناريا ايه .. فسألت الراجل بتاع العصافير هو ده صوت ايه ؟؟ قاللي : دي كناريا قولتله ودي بكام ... قاللي طبعا سعرها غالي جدا اغلي من كل العصافير كان تقريبا وقتها ب 300 ج قلت : طيب يعني لما اشتريها هتغني عندي كدة بنفس الطريقة قاللي : العصفور ده صاحب مزاج .. قلت : يعني ايه ؟؟؟ قاللي يعني مش هيغني كدة غير لما يكون مبسوط ومزاجه رايق قلت للراجل: يعني اعمل ايه يعني علشان ينبسط ونظبط مزاجه ..😃😃 قاللي : لازم تنوع في الاكل ... ذي فاكهة وبيض مسلوق .. لازم ياخد شاور كل شوية في الحر .. علبة مية صغيرة وهو هينزل فيها وبعدها يتشمس لازم كمان يبقى القفص في مكان عالي وهادئ . مطولش عليكم ... اشتريت الكناريا وعملت معاها كدة فعلا اول يومين مكنتش بتعمل صوت .. بعدها سمعت صوتها الجميل .. طرت من الفرحة وقعدت اسجل في صوتها واصورها فيديو ... هو ده بالظبط معنى الاية .. ازاي ؟؟ الكناريا .. هي انا وانتم .. ربنا بيهيئ لينا كل حاجة علشان يسمع صوت تسبيحنا .. بينوع في الاكل : بينوع في الخير اللي بيعمله معانا ومعطي بسخاء للكل بيحط علبة مية علشان ناخد شاور : وده باب التوبة المفتوح لينا .. بيرفعنا فوق العالم ... وبيدينا فرص حلوة نختلي معاه في خلوة حلوة .. بعد ما بيعمل كدة .. الكناريا ( انا وانتم ) اذا استجابت وغنت نغمات طويلة .. ساعتها هو بيفرح جدا ويبتهج وبيقول " اريني وجهك ، اسمعيني صوتك لان صوتك لطيف ووجهك جميل " فرحوا قلب ربنا بتسبيحكم وتوبتكم ... طالما هو هيأ لينا الجو المناسب .. ليه منرنمش ونفرح قلبه خليه يبتهج بنا بترنم .. ❤