لآ تؤخذ الناس من مناظرهم

لا تأخذ الناس من مناظرهم

سواق الاتوبيس انهارده كسر على واحد . فكسرله الفانوس بتاع عربيته ... كان قبلها الشاب ده سايق عادى ف حاله و راكب عربيه "بى ام" . لو شوفتها تقول ملك جواها . و سواق الاتوبيس ماسك التليفون و بيقول للى بيكلم واحد و بيزنق على الشاب ده و بيقول للى بيكلمه . عيل طرى و هعلمه الادب .. فى لحظات كنا بنقوله . يا عم سيبه ف حاله . يقول ما اللى يركب عربيه زى دى معاه يصلحها .. فضل من عبدالمنعم رياض لحد الاسعاف يزنق عليه . و يرخم . لحد ما شاله الفانوس و طبقله الاكصدام .. و سبق و الواد وقف .. على غير العاده . كل الركاب وقفوا و زعقوا و خلوا السواق يوقف الاتوبيس و اللى جنبى سحب المفتاح بتاع الاتوبيس و نزل ورا الناس .. و جريوا على الشاب ده و مبقتش فاهم ايه اللى بيحصل . فى ملحمه انسانيه مش مفهومة .. الغريب اننا لما وصلنا للشاب ده و طبعا كان نزل من العربيه . لقيناه قاعد على الرصيف بيندب حظه .. و لا اكن اب ماتله عيل من عياله .. الازمه اننا لما شوفناه اكتشفنا انه شكله ميوحيش انه صاحب العربيه .. شاب الشقا باين عليه و هدومه عاديه جدا . متجيش حتى تمن ربع فلوس فانوس العربيه اللى سايقها .. صدمته بكمية الناس اللى حواليه مش مفهومه . و هو بيعيط و بيقول و الله ما عربيتى .. مكانش فاهم اننا اللى كنا راكبين الاتوبيس .. بيقولنا انا سواق لمعرض تأجير و ده تالت يوم ليا . و بقا يخرج صور وصولات الامانه اللى ماضيها . و يقولنا انا مصدقت الاقى شغل . و مش هعرف ادفع تمن ده .. و بيتى هيتخرب .. فى لحظة كان السواق وسطنا و بيدور على المفتاح و كل ما يروح لحد ميلاقيهوش . لحد ما دخل علينا الولد اللى خد المفتاح و ساحب ف ايده ظابط جايبه من قدام دار القضاء . اكنه حاسس بالشاب السواق ده .. يابنى طيب حساب الحاجات دى كام .. قال رقم كان كبير نسبيا . كان حوالى ٢٥٠٠ جنيه .. سواق الاتوبيس قال مش دافع . قولناله مافيش مفتاح و نروح القسم و هتدفع و هنشهد .. من هنا لهنا وقفوا مع الظابط و خلاه راح جاب ٢٠٠٠ جنيه م الاتوبيس تقريبا ايراد كذا يوم يعنى ... العجيب بقا ان و هما واقفين مع الظابط واحدة ست ظهرت من النص و بدأت تلم مننا فلوس . و حطت ١٠٠ جنبه و بقا كل واحد يدفع اللى معاه . خمسين من هنا على ١٠٠ من هنا .. فلوس كتير و خدتنى و رجعنا الاتوبيس . كان لسه فى ركاب قاعدين . و فهمتهم و اللى دفع منهم .. لمينا اكتر من ١٣٠٠ جنيه .. الظابط نفسه بعد ما السواق دفع رجعلنا و خد الفلوس و سالنا دول كام . و شال ٣٥ جنيه و حط مكانهم ٢٠٠ جنيه .. بقا معنا ١٥٠٠ جنيه .. و الشاب ركب العربيه و لسه هيدور و يمشى . الست الجميله راحت خدت الفلوس و طبطبت على كتفه ... و قالتله دول مننا عشان عطلناك معانا و حلاوة الشغل الجديد .. و الشاب مشى و هو مش فاهم احنا طلعناله منين و ليه وقفنا معاه ... و احنا رجعنا الاتوبيس مش فاهمين ايه اللى حركنا من الكراسى بتاعتنا و خلانا نعمل كده .. مين اللى ادا لعقولنا الامر بانها تتجنن و تتحرك و لقلوبنا اننا يصعب علينا حد منعرفوش و نحس بانه اتظلم .. و اد ايه الشاب ده رزقه واسع و ربنا معاه و ف ضهره و خلا اكتر من ١٠ بنى ادمين يقفوا وراه و ميسبوش حقه .. حقيقى .. ربنا كبير اوي وطيب القلب وحنين جدا